Do 28-08-2024 ao 30-08-2024
Máis de medio cento de veciñas e veciños acudiron á xuntanza destinada a propietarias e propietarios de terreos con patrimonio megalítico que organizou o Concello de Vimianzo.
O catedrático da Universidade de Vigo, Fernando Carrera, explicoulles ás persoas asistentes o que é un dolmen, como se contruíron, para que se cre que se utilizaban, etc. Tamén lles falou acerca da protección legal dos monumentos e dos usos que lles poden dar ás fincas.
Pola súa parte o alcalde, Manuel Antelo, expresou a vontade do Concello por facerse coa propiedade das fincas que teñan monumentos megalíticos, ben a través de compras, permutas ou cesións de uso. O Concello colaborará cos propietarios e propietarias para informalos acerca dos usos que lles poden dar aos terreos e na tramitación dos permisos que teñen que solicitarlle a Patrimonio para realizar cortas, plantacións, etc.
Neste sentido nos vindeiros días o alcalde trasdladaralle unha solicitude á Xunta de Galicia para que, cando os propietarios soliciten permisos para tala ou repoboación, a Xunta lles indique en que casos deben solicitar outros permisos.
Ao final da xuntanza as persoas asistentes plantexaron as dúbidas que teñen acerca dos monumentos megalíticos e dos usos permitidos ou prohibidos nas súas propiedades.
Esta foi a primeira de outras xuntanzas e accións que se desenvolverán co obxectivo da posta en valor dos monumentos megalíticos do Concello de Vimianzo. En palabras, tanto de Fernando Carrera como de Manuel Antelo, a mellor maneira de conservar e respectar o patrimonio é coñecendo a súa orixe, o seu significado e a súa importancia.