Novas

06-02-2017

A réplica a escala do Batán de Servia pode visitarse no conxunto etnográfico dos muíños e batáns do Mosquetín

O conxunto etnográfico dos Batáns e Muíños do Mosquetín (Salto-Vimianzo)conta dende o pasado sábado cun novo atractivo para os visitantes. Un modelo a escala dun batán que permitirá comprender moito mellor o funcionamento destes tradicionais aparellos, que servían para bater tecidos até que as fibras se compactasen. As pezas están colocadas de xeito que se poida mover a roda que acciona todo o mecanismo.

A maqueta ten a súa historia particular. Nos anos 60, José Ces Ces, un bataneiro de Servia, na parroquia de Vilacoba (Lousame), vendo que esta industria esmorecía decidiu crear un modelo a escala e deixar un manuscrito co nome e tamaño das pezas para a posteridade. O historiador Xosé María Lema soubo da existencia da maqueta mentres estaba realizando un estudo sobre os batáns galegos e do resto da península, no marco da loita pola recuperación do Mosquetín. Grazas ás súas xestións e ás de Paco Doval, a familia doou desinteresadamente o modelo á Deputación da Coruña en 1999 para que estivese exposta no conxunto etnográfico vimiancés.

Tras moitos anos de espera, a maqueta poderase ver no Mosquetín tralo acondicionamento realizado polo Concello de Vimianzo. Isto é posible grazas ao cambio na xestión do conxunto, que desde a primavera depende directamente da acción municipal.