Novas

10-11-2016

O goberno de Vimianzo apoia as reivindicacións do cadro de persoal de Ferroatlántica

O alcalde do Concello de Vimianzo, Manuel Antelo, acaba de sacar un bando animando á cidadanía a apoiar as reivindicacións do cadro de persoal das factorías de Ferroatlántica en Dumbría e Cee.

No bando explícase que o Comité de empresa de Ferroatlántica está a desenvolver distintas accións para evitar que a empresa segregue as actividades industriais e as de produción de enerxía.

Esta segregación suporía, de facto, o peche das factorías de Dumbría e Cee. Este peche tería un custo social moi elevado na comarca, pois nas ditas factorías xenéranse ao redor de 400 postos de traballo directos.

O alcalde chama a poboación a participar na concentración de apoio ás demandas das traballadoras e traballadores o vindeiro sábado día 12 de novembro ás 17:00 en Cee.

Ao mesmo tempo tamén lle enviou un escrito á Deputación da Coruña solicitándolle un informe xurídico acerca da posibilidade da segregación da actividade de produción de enerxía. O Concello de Vimianzo é unha parte interesada, xa que unha das centrais de produción de enerxía de Ferroatlántica se atopa no Concello de Vimianzo.