Novas

02-11-2016

O goberno do Concello de Vimianzo escoita a voz da cidadanía

O goberno do Concello de Vimianzo iniciou o pasado sábado unha serie de xuntanzas coa cidadanía das distintas parroquias denominada “O alcalde escoita”.

Son encontros que se desenvolverán en todas as parroquias do Concello e nos que a cidadanía lle poderá trasladar directamente ao rexedor as súas demandas e necesidades. Deste xeito o goberno de Vimianzo coñecerá de primeira man as necesidades das súas veciñas e veciños a través dunha canle aberta e directa coa cidadanía.

As achegas que fagan as veciñas e veciños serán fundamentais para programar as futuras actuacións do goberno municipal en todo o relativo aos investimentos nas parroquias.

Segundo o alcalde, Manuel Antelo, este é un xeito de democratizar a vida municipal e de facer partícipe á cidadanía da xestión dos investimentos municipais. Para o alcalde é fundamental escoitar a voz das veciñas e veciños para recoller as súas demandas e solucionar os problemas cotiáns aos que se enfrentan.

A primeira das xuntanzas desenvolveuse na parroquia de Cereixo.
Participaron ao redor de medio cento de veciñas e veciños que lle transmitiron ao goberno municipal as súas propostas para investimentos e melloras na parroquia.