Novas

29-07-2016

O Concello de Vimianzo vai investir máis de 500.000€ na realización de distintas obras

O Concello de Vimianzo está en proceso de licitación ou xa ten formalizados os contratos dunha serie de obras que suman un importe total de541.909,63€.

A realización destas obras responde a demandas da veciñanza e ao compromiso do goberno local para manter en bo estado o patrimonio municipal. As actuacións están distribuídas por distintas parroquias do Concello.

As obras están financiadas a través de distintos programas como o Plan de cooperación de obras e servizos da Deputación da Coruña (POS), o Plan de aforro e investimento da Deputación da Coruña (PAI), do Fondo de compensación ambiental da Xunta de Galicia (FCA) e de outras subvencións da Xunta de Galicia.

Xa están formalizados os contratos para o arranxo e mellora do Muíño das Pasantes (POS), reparación da cuberta e mellora dos accesos á Casa do Concello (POS) e da mellora do firme da estrada Tines-Bamiro (PAI).

Están en proceso de licitación ou adxudicación os contratos para a mellora das beirarrúas en Pasarela (POS), para a construción dunha aula da natureza na contorna da Presa do Val en Baíñas (POS), para a mellora das instalacións da antiga escola de Vilar de Cereixo (FCA), para a mellora do alumeado da Piroga (FCA) e para construción dun Punto Limpo no Parque Empresarial de Vimianzo (Subvención da Consellaría de Economía e Indústria).

Ademáis destas actuacións están en fase de proxecto outras actuacións coma a mellora da pista polideportiva de Vimianzo, a realización da cuberta da pista de pádel municipal, a construción dunha pista polideportiva na contorna do Campo de fútbol, a mellora das instalacións da Escola Unitaria de Carantoña, a mellora de parques infantís en Serramo, Treos, Bamiro, O Mouzo (Carnés) e Tufións (Cereixo), a construción dunha praza na parroquia de Cereixo e o arranxo de pistas forestais en varias parroquias.

O alcalde, Manuel Antelo, destaca o compromiso do goberno municipal coa construción, mellora e conservación das infraestruturas municipais, tendo sempre presentes as demandas veciñais e investindo e realizando obras en todas as parroquias do Concello.

OBRA	ORZAMENTO
BEIRARRÚAS PASARELA (POS ADICIONAL 2015)	24076,28
MUÍÑO DAS PASANTES (POS 2016)	30213,7
AULA NATUREZA PRESA DO VAL (POS 2016)	108900
MELLORA ACCESO CASA CONCELLO (POS 2016)	25410
REHABILITACIÓN ESCOLA DE VILAR (FCA 2016)	39688
MELLORA FIRME TINES-BAMIRO (PAI 2015)	104560
ALUMEADO PIROGA (FCA 2016)	59989,65
PUNTO LIMPO	149072