Novas

O exército irmandiño conquista, un ano máis, a fortaleza de Vimianzo

A pasada fin de semana desenvolveuse a 21ª edición da festa do Asalto ao Castelo de Vimianzo.

Os actos xa comezaron antes pois dende o martes 17 locales de hostalaría paricipanban na 9ª edición da ruta dos pinchos irmandiños. Dende a organización destacan a enorme participación nesta actividade que fixo que nalgúns locais se esgotaran os pinchos e noutros houbera que agardar para atopar mesa. En breve coñeceranse as votacións dos participantes que premiarán ao mellor pincho e ao local mellor decorado.

Na noite do venres tocoulle o turno á Cea Medieval no foxo do Castelo. As persoas asistentes gozaron dun menú composto por polbo, carne á grella e torta de mazá. A cea estivo amenizada pola música de Cé Orquestra Pantasma e Quempallou.

O sábado foi o día grande das celebracións. A media tarde os pequenos e pequenas irmandiñas tomaron o castelo no Asaltiño, activiade dirixida aos pequenos da casa.

Logo do concurso de vestiario e de dar a coñecer aos gañadores dos premios ás mellorres fachadas as irmandades parroquiais, este ano procedentes de todo o territorio histórico da Terra de Soneira tomaron a Praza do Concello a ritmo de gaitas e tambores.

Coa praza chea de irmandiños e irmandiñas dispostos para o asalto izouse no balcón da Casa do Concello a bandeira da Irmandade.

Ás 22:00 h no Campo da festa a bergantiñana Ses quentou os motores do público cantando os seus temas cheos de ritmo e denuncia social.

O concerto de Ses deu paso a representación da obra Melodrama, prolegómeno de que o ariete desfilara pola rúa da Torre e botara abaixo as portas do castelo. Logo dunha húmida batalla entre as tropas irmandiñas e os defensores do castelo as irmandade conseguiron, coma todos os anos, tomar a fortaleza.

Contra a 1 e media da madrugada subiron aos escenario os vallisoletanos Celtas Cortos que repasaron o seu repertorio nun excelente concerto que será recordado polos asistentes.

Ás 2 e media chegoulle o turno á banda húngara Frikin, chegada dende Budapest para a ocasión.

As 4 da mañá puxo o punto final aos actos a actuación dos madrileños Spin te Kú.