Novas

28-06-2016

O Concello de Vimianzo apoia o Día Internacional LGBT despregando unha bandeira no seu balcón

O 28 de xuño celébrase o Día Internacional do orgullo LGBT.

O Concello de Vimianzo quere sumarse a estas celebracións e apoiar as súas reivindicacións e por iso despregou no balcón da Casa do Concello unha bandeira coas cores do movemento LGBT.

Con esta iniciativa pretende sumarse ás iniciativas de apoio ao movemento LGBT xa que continúa a ser imprescindíbel a superación das barreiras e as desigualdades que sofren as persoas que forman parte deste colectivo.

É responsabilidade dos representantes da cidadanía a de promover os cambios sociais para acadar a igualdade real para todas as persoas con independencia da súa orientación sexual para poder acadar unha sociedade máis xusta e igualitaria.

O Concello de Vimianzo tamén desexa mostrar o seu apoio ás vítimas e o seu rexeitamento aos recentes atentados de Orlando (Florida) contra membros da comunidade LGTB nos que foron asasinadas 50 persoas.