Novas

02-10-2015

O Concello de Vimianzo renova a súa imaxe corporativa

O Concello de Vimianzo renova a súa imaxe corporativa, substituíndo o escudo heráldico, que a partir de agora se reserva para actos de grande relevancia protocolaria e institucional, por unha nova composición que mostra a Torre de homenaxe do Castelo.

O estudo da nova marca tivo como punto de partida o emblema do concello, o castelo de Vimianzo, que tamén preside o escudo heráldico utilizado até o momento. Nel existen, ademais, outros motivos dos que se prescindiron nesta nova marca co fin de simplificalo para adquirir maior sinxeleza e modernidade. Escolleuse, para o novo símbolo, realizar un esquema trazado cunha soa liña da torre máis senlleira da fortaleza soneirá: a torre de homenaxe.

A marca incorpora un novo elemento: a identidade cromática. A cor elixida é unha mistura entre verde e marrón. Verde, cor de futuro, que inunda as paisaxes vimiancesas. Ao mesmo tempo, inclúese o marrón, cor do pasado e da historia. Máis concretamente é o Pantone 385C.

Esta nova imaxe irá substituíndo progresivamente ao escudo heráldico utilizado até o de agora.