Novas

31-07-2015

O Goberno de Vimianzo asesora á veciñanza con motivo dos cambios de Catastro

O alcalde, Manuel Antelo, e o tenente de alcalde, Fernando Mancebo, explicaronlle ao numeroso público que encheu o Auditorio da Casa da Cultura, en que consisten os cambios do Catastro que estes días lle están sendo comunicados á veciñanza.
Os representantes municipais deixaron claro que o Concello non está detrás dos incrementos dos valores, xa que esta regularización forma parte dunha campaña promovida polo Goberno Central, a través do Ministerio de Facenda, para regularizar os valores catastrais dos bens inmobles en todo o territorio do Estado Español.
Ante os numerosos erros que afectan nalgúns casos á superficie do ben, aos usos ou mesmo cambian o propietario, a recomendación é a de presentar alegación dentro do prazo de 15 días que outorga a Administración.
O alcalde anunciou que se lle vai requirir ao Goberno Central que autorice ao Concello de Vimianzo a levar a cabo unha rebaixa do Imposto de bens inmobles (IBI).
Ao mesmo tempo no Pleno do Concello do vindeiro sábado día 1 de agosto presentarase unha proposta para modificar a Ordenanza reguladora do Imposto de bens inmobles co gallo de permitir unha bonificación para as construcións agrícolas dun 95%, contribuíndo, desta maneira, á creación de emprego e riqueza por parte das explotacións agrícolas e gandeiras.