Do 10-09-2024 ao 02-10-2024
Se a semana pasada a Escola de Teatro de Berdoias enchía o auditorio da Casa da Cultura, este domingo Os Sapapusios de Pasarela non quedaron atrás e tamén colgaron o cartel de completo. Pouco despois das oito da tarde saían á escena os actores dispostos a facer gozar ao público dunha tarde de diversión e risas aseguradas, e non defraudaron. José Mª Rocha, Carmen Canosa, Daniel Caamaño, Begoña Lema, Elena Alvarellos e José Manuel Lema fixeron a súa actuación estelar levantando en numerosas ocasións o aplauso do patio de butacas. A divertida trama xunto coa magnífica interpretación dos actores, na que tivo moito que ver o director, resultaron ser unha combinación perfecta para acadar o éxito.
O vindeiro domingo haberá unha nova sesión de teatro con dobre funcións a cargo das escolas de teatro infantil de Carantoña e Vimianzo, que poñerán en escena A lei do peixe fritido e O merlo branco.