Novas

12-06-2026

Vimianzo conta cunha nova instalación dotada dun moderno sistema de tratamento de auga potable

O Concello de Vimianzo vén de rematar as obras de mellora da Estación de Tratamento de Auga Potable (ETAP), unha actuación destinada a optimizar o proceso de potabilización e reforzar a calidade da auga que chega ás vivendas do municipio.

Os traballos realizados permitiron incorporar unha nova fase de decantación, ampliar o sistema de filtrado e reorganizar o proceso de desinfección, mellorando de maneira significativa a eficiencia das instalacións. Grazas a estas actuacións, será posible eliminar con maior eficacia sólidos, turbidez e outras partículas presentes na auga antes da súa distribución á rede de abastecemento.

Esta intervención contribuirá a garantir unha auga de maior calidade e máis segura para o consumo, ao tempo que permitirá adaptar as instalacións ás necesidades actuais e futuras do servizo. Trátase dunha actuación fundamental para reforzar a fiabilidade do abastecemento municipal e seguir avanzando na modernización das infraestruturas básicas do concello.

O investimento realizado ascendeu a 162.860 euros e foi financiado a través do Plan Provincial de Cooperación ás Obras e Servizos de Competencia Municipal (POS+) da Deputación da Coruña, administración á que o Concello de Vimianzo quere agradecer o seu apoio para facer posible esta importante mellora.

Desde o Goberno local destacan a importancia de continuar investindo na mellora dos servizos públicos esenciais, garantindo infraestruturas máis eficientes, seguras e preparadas para responder ás necesidades da veciñanza.

Con esta actuación, o Concello de Vimianzo reafirma o seu compromiso coa calidade dos servizos municipais, a saúde pública e o benestar da cidadanía.