Novas

21-01-2026

O Concello presenta en Madrid a súa nova campaña de promoción turística “Vimianzo. Comeza a túa conquista”

O Concello de Vimianzo presenta en FITUR 2026 a súa nova campaña de promoción turística baixo o lema “Vimianzo. Comeza a túa conquista”, unha peza audiovisual que ten como obxectivo posicionar o municipio como punto estratéxico e enclave privilexiado desde o que descubrir a Costa da Morte.

O vídeo, cunha duración aproximada de minuto e medio, e cun ánimo próximo e enérxico, ten por obxectivo fundamental transmitir a idea de Vimianzo como “campamento base” e corazón da Costa da Morte, desde onde o visitante pode acceder comodamente aos principais destinos da comarca: Fisterra, Camariñas, Laxe, Malpica, entre outros.

A través dunha narración inspiradora, a campaña convida a “conquistar” a experiencia da Costa da Morte sen présas, sen masificacións e coa autenticidade que caracteriza o territorio. A mensaxe reforza a imaxe de Vimianzo como un lugar tranquilo, acolledor e perfectamente conectado, ideal para gozar da paisaxe, da cultura e da gastronomía da zona.

Con esta iniciativa, Vimianzo preséntase non só como destino en si mesmo, senón como corazón loxístico e emocional da Costa da Morte, convidando ás persoas visitantes a comezar aquí a súa conquista do territorio.

A alcaldesa, Mónica Rodríguez, sinalou durante a súa intervención que “Vimianzo é un lugar para chegar, quedar e desde o cal comezar a descubrir todo o que pode ofrecernos a Costa da Morte. Queremos que quen nos visite sinta que este é o seu campamento base, un espazo acolledor desde o que conquistar a nosa comarca con tempo para gozar do que realmente importa.”