Novas

09-04-2025

Vimianzo celebrará a Noite Mundial Starlight cunha actividade astronómica no miradoiro Furna do Sapo

O Concello de Vimianzo celebrará a XVIII edición da Noite Mundial Starlight cunha actividade astronómica no miradoiro Furna do Sapo. A xornada, organizada en colaboración coa Fundación Starlight, terá lugar o vindeiro 20 de abril.

Baixo o lema ‘Observar o ceo é ler o universo’, este miradoiro ofrece á veciñanza e visitantes unha das panorámicas máis espectaculares da ría de Camariñas. A sensación de estar sobrevoando a auga fai deste espazo o lugar ideal para unha noite de observación solar e astronómica.

O evento desenvolverase de 20:30 a 23.00 horas e é necesario realizar inscrición previa a través da seguinte ligazón.

Continúase así coa promoción de Vimianzo como destino starlight, xa que son varios os lugares dos que se pode gozar no municipio desta actividade. Por iso, desde o Concello animan á cidadanía a participar nesta actividade para gozar dunha noite única, na que a natureza e a emoción de mirar ao ceo creará unha experiencia inesquecible.