Novas

O CEIP San Vicenzo súmase ao ‘Día da Educación Física na Rúa’ organizado polo COLEF

O CEIP San Vicenzo será un dos participantes no ‘Día da Educación Física na Rúa’, organizado polo Colexio Oficial de Licenciados en Educación Física e Ciencias da Actividade Física, co obxectivo de poñer en valor a Educación Física, promover hábitos saudables e destacar a súa importancia como ferramenta de inclusión social.

Durante esta semana, o alumnado do centro educativo participará en dúas xornadas no exterior promovidas para visibilizar o papel fundamental da actividade física na saúde, así como transmitir valores como o respecto, a igualdade e a diversidade. O obxectivo é concienciar que estas prácticas son ferramentas poderosas para romper barreiras sociais, promovendo a igualdade e o respecto á diversidade.

Hoxe, 7 de abril, os alumnos e alumnas de Educación Infantil e 1º e 2º de primaria realizarán un ‘Roteiro saudable’ e coñecerán os ‘Xogos do Mundo’, de 12:30 a 14:00 horas.

O mércores, 9 de abril, será a quenda dos nenos e nenas de 3º, 4º, 5º e 6º de Educación Primaria, que participará nunha xornada na praza do Concello centrada na práctica de deportes alternativos inclusivos como o Datchball e o Noqball.  Terán lugar de 11:00 a 12:00 e de 12:30 a 13:30 horas.

Coa súa adhesión, desde o CEIP San Vicenzo buscan reivindicar o papel da Educación Física como motor de integración e como elemento clave para fomentar hábitos saudables e contribuír á formación integral do alumnado.