Novas

18-11-2024

Rematadas as obras de mellora no viario de Romar, na parroquia de Berdoias

O Concello de Vimianzo vén de rematar as obras de mellora no viario do lugar de Romar, na parroquia de Berdoias.

A actuación, que contou cun orzamento de 136.826 euros con cargo ao Plan Único da Deputación da Coruña 2023, incluíu a pavimentación con formigón de mallazo nunha superficie de 1870 metros cadrados.

Ademais, de maneira previa, levouse a cabo a canalización para a recollida de pluviais e a instalación de 14 arquetas con sumidoiro e tres pozos.

Os traballos completáronse coa execución de dous muros de granito rematados cunha varanda metálica. Co obxectivo de mellorar a circulación dos vehículos no interior do núcleo e aumentar a seguridade neste punto, ampliouse o ancho da vía. Tamén se procedeu á correspondente sinalización vertical do lugar.

O concelleiro de Obras, Miguel Ángel Pérez, apuntou que este é “un paso máis na mellora do noso rural, que estamos a dotar de infraestruturas de calidade que contribúan ao benestar dos seus habitantes. Seguimos traballando para aumentar a seguridade viaria e aumentar as conexións entre os diferentes puntos do noso municipio”.