Novas

14-11-2024

Posta en marcha do Plan de Xestión da Paisaxe Protexida dos Penedos de Pasarela e Traba

A Xunta de Galicia presentou hoxe nunha visita aos Penedos de Pasarela e Traba o seu Plan de Xestión, o primeiro que se aproba en Galicia para garantir a protección e conservación dunha paisaxe protexida.

O presidente autonómico, Alfonso Rueda, e a conselleira de Medio Ambiente e Cambio Climático, Ánxeles Vázquez, fixeron un percorrido pola zona acompañados do alcalde de Laxe, Francisco Charlín, e a rexedora de Vimianzo, Mónica Rodríguez.

Trátase dun espazo natural único pola singularidade e valor, pola riqueza da súa biodiversidade e pola súa situación xeográfica.

O Plan de xestión, que saíu publicado no día de hoxe no Diario Oficial de Galicia e que entrará en vigor en 20 días, busca definir os principais valores da zona e regular os usos e actividades que se poden realizar neste espazo natural.

Rodríguez sinalou a “importancia de dar a coñecer a riqueza coa que contamos e poñela en valor. Este plan é un antes e un despois para seguir traballando e con investimentos que nos permitirán manter este espazo coidado e convertelo en todo un punto de referencia”.