Novas

22-10-2024

O Castelo acolle a presentación da guía de viaxe ‘Patrimonio arquitectónico da provincia da Coruña’

O Castelo de Vimianzo acolleu na xornada de hoxe, 22 de outubro, a presentación da guía de viaxe ‘Patrimonio arquitectónico da provincia da Coruña’, editada pola Deputación da Coruña.

No acto participou a alcaldesa, Mónica Rodríguez, o deputado de Patrimonio, Xosé Penas, e Maite Vence, coordinadora do proxecto e directora de Observer Science Tourism.

A obra fai un percorrido histórico por “trece marabillas” da provincia, dando a coñecer o patrimonio arquitectónico e cultural da mesma. Trátase de: o propio Castelo de Vimianzo, as Torres de Altamira, o mosteiro de San Xoan de Caaveiro, as Torres do Allo, os Batáns de Mosquetín, o Pazo do Mariñán, o Teatro Colón, o Ecomuseo Forno do Forte, o Centro de interpretación da natureza, o Centro etnográfico de Teixeiro e os dolmens de Axeitos, Cabaleiros e Dombate. Ademais, esta guía amplía o coñecemento sobre estes lugares, para descubrir en profundidade a historia da Coruña contada desde os seus monumentos.

Complétase tamén coa narración de diferentes experiencias asombrosas, con fotografías atraentes, curiosidades e informacións imprescindibles para todas aquelas persoas en achegarse ata aquí.

Co obxectivo de dar a coñecer en profundidade a provincia, nesta peza tamén se plasman outros puntos de interese próximos, con suxestións para preparar a mellor viaxe posible.

Durante a súa intervención, a rexedora quixo agradecer que a Deputación “escollera este marabilloso espazo para facer a presentación dun acto tan relevante. O noso Castelo é o faro que nos ilumina, testemuña da nosa historia e símbolo da nosa identidade”, así como unha parte “fundamental do patrimonio da nosa provincia”.

Ademais, definiu esta guía como “unha peza ideal, que nos permite mergullarnos na tradición, na historia e en todos os aspectos que conforman a nosa contorna. Unha ferramenta ideal para comprender e valorar aínda máis o que temos”.

Pola súa parte, Penas fixo referencia a que “non falamos dunha guía de viaxe ao uso, pois esta publicación fala de tradicións, de historia, de lendas, de formas de vivir e relacionarse co territorio, de cultura, de maneiras de viaxar, de rutas, de accesibilidade e de coordenadas, sen perder de vista a importancia que o patrimonio ten para o turismo”.