Novas

26-12-2023

O Concello mellorará o viario que une Carnio e Arxomil

O Concello de Vimianzo vén de licitar o proxecto de mellora do viario que une Carnio e Arxomil, así como un en Xora e o que vai de Reboredo a Tines. O orzamento base da licitación do contrato son 74.340,67 euros, e o prazo de presentación de ofertas remata o 10 de xaneiro de 2024. Está incluído no Plan Único Adicional da Deputación da Coruña 2023.

No relativo ao primeiro, preténdese optimizar a capa de rodaxe dunha vía de 200 metros de lonxitude por 4 metros de ancho, con tratamento asfáltico superficial e rego de selado. Previamente repararanse os baches e perfilaranse as mordentes con grava e tratamento asfáltico semiprofundo. Contémplase tamén a apertura
de gabias e limpeza de salvagabias para a correcta drenaxe lonxitudinal e transversal.

En Xora, actuarase nunha vía de 200 metros de lonxitude e 5 metros de ancho, con 5 centímetros de zahorra e 15 centímetros de grava, tratamento asfáltico semiprofundo e tratamento asfáltico superficial e rego de selado. Tamén se abrirán as gabias e limparanse as salvagabias para a correcta drenaxe lonxitudinal e transversal.

Por último, a infraestrutura que vai de Reboredo a Tines mellorarase en tres fases, xa que está dividida en tres treitos cunha lonxitude total superior aos 350 metros, e un ancho de 4,5 metros de media. Aplicarase tratamento asfáltico superficial e rego de selado, previa reparación dos baches e perfilado de mordentes con grava e tratamento asfáltico semiprofundo. Como nos anteriores, contémplase a apertura de gabias e a limpeza de salvagabias para a correcta
drenaxe lonxitudinal e transversal.

Miguel Ángel Pérez, edil de Obras, sinala que este compendio de melloras responde “a unha liña de traballo continuísta no que a optimización de infraestruturas públicas se refire”, enfatizando a “natureza do noso municipio, que é o sexto en extensión territorial e que precisa dunhas acometidas regulares para poder actuar en todas as zonas que o necesitan”. Pérez subliña que “a nosa intención é efectuar tarefas deste tipo nas 14 parroquias de Vimianzo, e nos seus 133 lugares, dun xeito homoxéneo para que as conexións interparroquiais redunden no benestar da veciñanza”.