Novas

10-10-2022

Vimianzo participará no V Ciclo Nacional de Cine e Mulleres Rurais

O Concello de Vimianzo participará no V Ciclo Nacional de Cine e Mulleres Rurais coa proxección o vindeiro 14 de outubro do filme de Lois Patiño ‘Lúa Vermella’. Será no Auditorio da Casa da Cultura ás 20:30 horas con entrada libre ata completar aforo.

Trátase dunha iniciativa organizada polo Ministerio de Agricultura, Pesca e Alimentación, unha homenaxe ás mulleres rurais que tamén pretende visibilizar o medio rural e facer co partícipes dos seus modos de vida ós habitantes de pobos e cidades.

O obxectivo desta iniciativa é poñer de relevancia o traballo que realizan as mulleres do ámbito rural. Tamén, busca achegar á poboación urbana a maneira de vida real destes lugares, destacando o papel vertebrador, social e económico das mulleres, propiciando a comprensión e a complicidade entre a veciñanza.

Un total de 20 propostas cinematográficas integran a mostra que, nesta quinta edición, combina proxeccións presenciais en 70 localidades da península ibérica, e streaming de balde, aproveitando así o potencial de Internet para acadar un público amplo e xeograficamente disperso.