Novas

18-03-2022

Concello e Deputación xa pensan na segunda fase do proxecto de reforma da instalación eléctrica do Castelo

A Deputación da Coruña e o Concello de Vimianzo xa pensan na segunda fase do proxecto de reforma da instalación eléctrica do Castelo. Tras licitar unha primeira fase, que está en execución e estará lista antes de Semana Santa, xa se ten a vista posta na continuación dun proxecto que comezaba o pasado ano. A alcaldesa, Mónica Rodríguez; o concelleiro de Obras, Miguel Ángel Pérez e técnicos da entidade provincial Marina Cabana, José Yáñez e David Beiras visitaron esta mañá o espazo.

Por ser un Ben de Interese Cultural (BIC) realizouse a substitución de condutores, mecanismos e elementos de iluminación minimizando a actuación sobre a contorna. Contou cun orzamento de 103.751,96 euros e consta das seguintes actuacións: a instalación de cadros eléctricos novos, ademais da nova iluminación e novos aparellos de emerxencia e sinalización. Tamén se instalarán novos condutores onde sexa necesario, e novas canles realizadas en tubaxe de cobre para canalizar os novos circuítos. Instalase tamén unha nova toma de terra.

A nova instalación cumprirá estritamente todos os requisitos e esixencias básicas en temas de seguridade estrutural e no caso de incendio, así como os parámetros básicos de aforro de enerxía.

O presidente da Deputación da Coruña, Valentín González Formoso, sinala que esta intervención é “unha continuación da nosa firme aposta polo coidado e posta en valor dun dos edificios máis senlleiros da provincia e que acolle anualmente eventos culturais como a Mostra de Artesanía en Vivo”.

Pola súa banda, a alcaldesa de Vimianzo, Mónica Rodríguez, quixo agradecer “tanto o presidente como ó deputado de Patrimonio, Xosé Lois Penas e ó equipo técnico da Deputación o ter desenvolto un proxecto que era moi necesario no interior do noso Castelo, e xa pensamos en mellorar tamén o sistema no exterior, que non só suporá melloras a nivel de aforro, tamén estéticas”.