Novas

Máis de 450 escolares participaron no programa didáctico da exposición de Xurxo Martiño

Un total de 467 escolares participaron desde o pasado día 12 de marzo na programación didáctica da exposición de pintura de Xurxo Martiño que remataba na mañá de hoxe cos alumnos do IES Terra de Soneira. O propio Martiño foi o encargado da elaboración da programación na que participaron o CEIP San Vicenzo, O CEIP de Baíñas, as tres escolas unitarias e o IES Terra de Soneira. Martiño realizou un programa dividido en grupos segundo as idades e os niveis de coñecemento dos participantes. Deste xeito o nenos e nenas de educación infantil traballaron a profundidade de campo por superposicións de planos, creando unha paisaxe cun determinado número de elementos. O alumnado de 2º e 3º de primaria aprendeu a elaborar un retrato fraccionado en cuadrículas empregando a técnica da colaxe. 4º e 5º traballaron coas formas xeométricas simples como base para encaixar un debuxo; e 6º aprendeu a analizar unha obra de arte mediante un proceso de observación detallado para realizar unha copia dun cadro da exposición baseándose nun aspecto concreto do mesmo. Os máis maiores, o alumnos e alumnas do instituto, pecharon hoxe a programa aprendendo a traballar cunha das primeiras técnicas de reprodución: a serigrafía. Deste xeito os escolares de Vimianzo tiveron a oportunidade de recibir unha clase maxistral da man do pintor de Caxadas e de non ser simples expectadores dunha exposición. 
O vindeiro sábado, día 24, Martiño volverá á Sala de Exposicións para facer unha xornada aberta para todas as persoas que o desexen, aínda que o concello convidou especialmente ás asociacións, o pintor guiaranos pola súa propia exposición, contestando todas as dúbidas que nos poidan xurdir respecto dos cadros, das técnicas artísticas, etc. Nesta xornada aprenderemos a desenvolver a capacidade crítica para entender e valorar obras de arte e "aprenderemos a ver" unha exposición. 
A cita será o sábado 24 ás 17 horas na Sala de Exposicións Antón Mouzo.