Novas

29-03-2021

Vimianzo aproba proxectos de gran calado para o municipio por un valor de 4,8 millóns de euros

O Concello de Vimianzo celebrou o 26/03/21 unha sesión plenaria na que saíron adiante proxectos de gran calado para o municipio por un valor de 4.851.385,88 euros, entre os que destacan o proxecto de renovación da iluminación cunha subvención do IDAE, a nova licitación do Servizo de Axuda no Fogar e unha modificación orzamentaria por valor de 375.484,28 euros.

O punto no que houbo máis discrepancias foi no segundo, no “ditame sobre a aprobación do expediente de contratación do proxecto do alumeado exterior”, ao presentar Adiante Vimianzo unha enmenda na que cuestionaba os criterios de contratación.

O goberno local, ante isto, manifestou que se decide nun balance onde os criterios avaliables mediante xuízos de valor contabilizan 45 puntos, e os criterios de valoración automática supoñen 55 puntos do total, buscando sempre a mellor calidade prezo para obter o mellor resultado tanto na obra como no subministro. Adiante Vimianzo votou en contra, o Partido Popular abstívose e o grupo de goberno votou favorablemente este proxecto.

Houbo unanimidade no terceiro punto, sobre o “ditame sobre a aprobación do expediente de contratación do Servizo de Axuda no Fogar”. A licitación ofrecerase por catro anos, baixo a fórmula 2+1+1, e suporá un total de 2.175.901,6 euros. Trátase, en palabras do goberno local, dun servizo “prioritario” para a veciñanza máis maior, e “queremos que Vimianzo volva a ser un referente nos servizos sociais.”

Conseguirase así un aforro de máis do 50% para as arcas municipais no que respecta á facturación deste servizo, implementándose a tecnoloxía LED, máis eficiente e con menor impacto ambiental. Cabe destacar que estas luminarias empregan o 95% da enerxía da luz e tan só se desperdicia un 5% en calor, facéndoas máis duradeiras. Renovaranse 4010 puntos de luz en todo o municipio.

Tamén se considerou aprobada a modificación orzamentaria presentada polo goberno local, de 375.484,28 euros, que se destinarán á mellora do paseo de Cereixo, para arranxo do firme e ampliación da ponte en Baíñas, o arranxo de diversos camiños municipais, reparación da ponte da Casiña, substitución de nova sinalización viaria e sinaléctica denominativa dalgúns dos núcleos do municipio, cambio de elementos en diversos parques infantís e pavimentación dun tramo na Gándara.

Aprobouse tamén a moción presentada por Adiante Vimianzo sobre as alegacións ao parque eólico de Berdoias e a súa estrutura de evacuación por unanimidade, pola “protección do noso patrimonio”, argumentaron os grupos.

O Partido Socialista de Vimianzo presentou tamén unha moción para apoiar a integración nun CRA das Escolas Unitarias de Carantoña, Carnés, Traba, Castromil, CEIP de Camelle e CEIP de Torrexallóns. Foi aprobada por unanimidade.

A alcaldesa, Mónica Rodríguez, ao rematar a sesión, cualificou a aprobación destes proxectos como “un antes e un despois do noso municipio. Son intervencións moi necesarias e coas que realmente daremos un salto cualitativo moi grande, incrementando o benestar das nosas veciñas y veciños”, argumentou.

Lamentou, por outra banda, que “as críticas por parte de Adiante Vimianzo tratando de desestabilizar o traballo por parte do grupo de goberno, evitando dicir en todo momento que estes proxectos son imprescindibles.”