Novas

01-03-2021

Vimianzo recibe a visita da subdelegada do Goberno para coñecer os desperfectos provocados pola borrasca Karim

Os danos provocados hai dúas semanas tras o paso da borrasca Karim por Galicia é un tema que preocupa, e moito, aos rexedores e rexedoras da terra de Soneira.

Vimianzo recibiu hoxe a visita da subdelegada do Goberno, Pilar López- Rioboo, quen se trasladou ata a zona para coñecer de primeira man os desperfectos ocasionados e a súa magnitude.

Ata o municipio tamén acudiu María Dolores Gómez, a responsable de Protección Civil en Galicia, para explicarlles de primeira man aos rexedores e rexedoras do municipio soneirán, Camariñas, Muxía, Cee, Dumbría e Ponteceso o procedemento técnico a seguir para poder subsanar os danos, así como explicarlles a normativa e que danos poden ser obxecto de protección económica.

O prazo para presentar as solicitudes de axuda é dun mes desde o día seguinte ao de finalización do feito causante da situación de emerxencia. As subvencións en atención a determinadas necesidades derivadas de situacións de emerxencia ou natureza catastrófica, establecido no Real Decreto 307/2005, de 18 de marzo, van dirixidas a unidades familiares, corporacións locais, comunidades de propietarios ou titulares de establecementos mercantís, industriais ou de servizos. Pódese obter máis información en www.proteccioncivil.es, no apartado “Axudas e subvencións”.

A subdelegada do Goberno, Pilar López-Rioboo, sinalou que “estudaremos as posibles solucións para paliar os efectos da borrasca Karim e que causou danos en espazos tanto públicos como privados.”

A alcaldesa de Vimianzo quixo agradecer a vontade “tanto de Subdelegación como da subdelegada do Goberno, que hoxe nos acompaña aquí, e tamén a María Dolores, como directora de Protección Civil, para coñecer en primeira instancia os danos provocados pola borrasca Karim. Somos concellos con danos importantes e precisamos axudas, así como coñecer a cales nos podemos acoller porque os danos nas vías municipais e nos edificios públicos son considerables.”

A rexedora destacou a importancia “do mantemento diario tanto en cunetas, sumidoiros e demais espazos, xa que estas actuacións que se levan a cabo durante todo o ano minimizaron o impacto do temporal, e aínda así os danos son cuantiosos en moitos lugares de Vimianzo”, destacou.

A alcaldesa de Camariñas, Sandra Insua, sinalou que “é moi importante actuar á maior celeridade posible, xa que hai actuacións que demandan unha intervención axiña e ser coñecedores tanto da lexislación como dos parámetros técnicos axudaranos a reaccionar ante os efectos do temporal”.

Pola súa banda, o alcalde de Muxía, Iago Toba, recalcou a “necesidade inmediata de obter cobertura tanto técnica como económica para poder subsanar os danos provocados por esta borrasca. Son moitas as vías e camiños municipais afectados e a coordinación entre administracións será fundamental para reverter a situación”, finalizou.