Do 10-09-2024 ao 02-10-2024
Acompañada por nenos e nenas da Escola Municipal Os Vimianciños e do campamento do Furancho Deportivo, e ca axuda dos artesáns que traballan a diario no Castelo de Vimianzo, a alcaldesa Mónica Rodríguez completou o izado do pendón dos Moscoso na torre de homenaxe da fortaleza vimiancesa, acto que marca o inicio das celebracións do Asalto ao Castelo.
As actividades darán comezo esta mesma semana ca xa tradicional Legua Irmandiña, que acada este ano a súa quinta edición, e proseguirán ca degustación dos Pinchos Irmandiños, entre o día 2 e o 6 de xullo.
No medio da vindeira semana, a representación teatral rememorará, o día 3 pola noite, os tempos dos Moscoso e das Guerras Irmandiñas na Casa da Cultura.
O venres 5 e o sábado 6 concentraranse o groso das actividades que combinan, dende o Asalto ao Castelo -e o Asaltiño, na súa versión para pequenas e pequenos- ata os concertos, a cea medieval, a feira artesanal e múltiples actividades para toda a familia.
Por último, o domingo 7 de xullo, o grupo de teatro Os Quinquilláns realizarán dous pases das súas representacións no propio castelo, ás 13 e ás 17 horas.