IV PLAN DE IGUALDADE DE OPORTUNIDADES ENTRE ENTRE MULLERES E HOMES DO CONCELLO DE VIMIANZO (2022-2026)

Cando falamos de igualdade, falamos dunha sociedade na que mulleres e homes teñan os mesmos dereitos e oportunidades. Falamos dunha sociedade que non reproduza estereotipos, roles e mandatos de xénero que dificultan o libre desenvolvemento das persoas. Falamos dunha sociedade na que nacer muller non supoña poder sufrir desigualdades, discriminacións e violencias específicas polo simple feito de selo.

Alcanzar esa igualdade de maneira real e efectiva e lograr acadar esa sociedade xusta, igualitaria e respectuosa é unha tarefa lenta e complexa. Precisamente, porque sabemos da súa complexidade, asumimos conscientes este compromiso de traballo real da incorporación e implantación das políticas de igualdade, como administración máis próxima á cidadanía.

Con este obxectivo, presentamos este IV Plan de Igualdade de Oportunidades entre Mulleres e Homes do Concello de Vimianzo (2022-2026), que será un plan estratéxico que sirva de motor para unha transformación social que nos permita ir avanzando cara a unha sociedade máis igualitaria, en definitiva unha sociedade mellor.

Como alcaldesa do Concello de Vimianzo, e como MULLER, síntome orgullosa do compromiso adquirido para facer do noso concello un lugar onde a igualdade de oportunidades sexa a base da convivencia.

Mónica Rodríguez Ordóñez

Alcaldesa de Vimianzo