Salto

• Superficie: 25 Km²
• Habitantes
• Lugares: A Lagoa, A Costa, Cainzadas, Castro, Castromil, O Careixo, O Mosquetín, Reboredo, Reparada, Salto, Santa Irena, Señoráns, Torelo.

A parroquia de Salto é a parroquia máis extensa do concello de Vimianzo e está situada ao norte deste concello. Limita polo norte co concello de Laxe, polo leste co concello de Zas e coas parroquias de Bamiro e Tines; polo sur coa parroquia de Treos e polo oeste coas parroquias de Vimianzo e Calo.

Salto é unha parroquia basicamente agrícola e gandeira, mais hai que destacar a presenza dunha piscifactoría á beira do río Grande, no lugar do Mosquetín. Neste mesmo lugar, á beira da piscifactoría, atopamos o conxunto etnográfico conformado por varios muíños e dous batáns actualmente propiedade da Deputación da Coruña.

A pegada megalítica nesta parroquia témola no lugar de Castro que debe o seu nome á existencia dun castro no lugar.

A igrexa parroquial de Salto atópase no lugar do mesmo nome, preto do lugar de Castro. A grande extensión da parroquia fixo que se erguesen capelas nos lugares máis distantes: na Lagoa a ermida da Virxe da Peregrina e a capela de Santa Helena. De máis recente construción é a igrexa parroquial de Castromil. No alto do monte de San Bartolomeu (412 m.) tamén se ergue unha capela de devoción a este santo, datada de 1681.

En canto á fidalguía local atopamos nesta parroquia o Pazo de Castromil, que conta cunha capela particular, e dúas casas brasonadas máis en Señoráns.

Festas: San Eleuterio de Salto, Santa Helena (principios de maio), a Virxe da Peregrina na Lagoa (16 de agosto), San Bartolomeu (24 de agosto) e San Ramón en Castromil (31 de agosto).

Os datos deste apartado foron sacados de: A Terra de Soneira, no corazón da Costa da Morte (varios autores, Xosé Mª Lema, coord.), Os mellores pazos da Costa da Morte (Xosé Mª Lema), A arte relixiosa da Terra de Soneira (Xosé Mª Lema) e do Instituto Nacional de Estatística (datos poboación de 2012)