27-10-2026
O Concello de Vimianzo recoñece os éxitos deportivos do Club Dousxsetenta na temporada 2025-2026
O Concello de Vimianzo recibiu este domingo o Club Dousxsetenta nun acto de recoñecemento á magnífica temporada 2025-2026 e aos importantes resultados acadados polos seus arqueiros e arqueiras.
Durante o encontro destacouse o elevado número de medallas conseguidas nos Campionatos Galegos de Sala e Aire Libre, o segundo posto do club na Liga Galega de Aire Libre e os destacados resultados de Nicolás Soto e Yago Rellán nos Campionatos de España.
A recepción serviu tamén para agradecer o labor de José María Lema, presidente saínte do club, e dar a benvida a Enrique Rellán, que asume a nova presidencia. Así mesmo, recoñeceuse o esforzo de todos os deportistas que representaron a entidade ao longo da temporada.
Un dos momentos máis emotivos da xornada foi a homenaxe ao adestrador Víctor Santos, a quen a familia Dousxsetenta quixo expresar o seu agradecemento pola dedicación e o traballo desenvolvidos durante tantos anos, fundamentais para a evolución e o crecemento do club.
O encontro rematou cunha comida de confraternización, nun ambiente de compañeirismo e celebración compartida.
Con este recoñecemento, o Concello de Vimianzo pon en valor o traballo do Club Dousxsetenta e o papel do deporte como espazo de formación, convivencia e superación, así como a súa contribución á proxección do nome do municipio nas competicións galegas e estatais.
O Concello traslada os seus parabéns a toda a familia Dousxsetenta por unha temporada chea de éxitos e anímaos a continuar nesta liña de traballo e compromiso co deporte.